Vice President-in Arunachal Pradesh thleng

India vice president C. P. Radhakrishnan chu September 8 khan ni hnih cham turin Arunachal Pradesh khawpui Itanagar a thleng. Vice President hi Hollongi-a Donyi Polo Airport-ah governor Lt. Gen. K.T. Parnaik leh chief minister Pema Khandu-ten an lo hmuak a, Arunachal Pradesh police-te chuan Guard of Honour an hlan bawk.

Vice President pual hian Lok Bhavan-ah hun hman a ni a, community hrang hrang member-te chu hnam incheinaa inthuamin hun an hmang ho a ni. Governor Lt. Gen. K. T. Parnaik chuan Vice President-in a tlawhna hian rah ṭha a chhuah a beisei thu a sawi. Vice President leh mipuiin inbiakna an neih chuan state hmasawn kawngah a ṭha lamin nghawng a nei dawn tih sawiin, a bikin ṭhalaite zingah inrintawkna a thlen dawn tih a sawi.

Lok Bhavan-a Durbar Hall-ah Vice President chawimawina atan 'The Land of Cultures and Traditions' tih thupui hmangin programme hman a ni. He hunah hian Doimukh-a Rono Hills-a Department of Fine Arts and Music, Rajiv Gandhi University chuan Hindustani Classical Music an perform bawk. Hei bakah Vivekananda Kendra Vidyalaya leh Jomu Norbu Khrimey Public School chuan Bharatanatyam leh Kathak an perform a ni. Vice President hi state cabinet member, parliament member leh mi pawimawh dangte nen state hmasawnna bakah hma hun lo awm tur atana ruahmanna an neihte an sawi ho bawk.