Tripura: Smart vehicle scanning system dah tum

Tripura sorkar chuan Assam-Tripura ramria Churaibari check post-ah vehicle scanning system dah tumin ruahmanna an siam. He system hian state chhunga bungraw phur lut ṭhin lirtheite a endik dawn tih Finance and Information Technology minister Pranajit Singha Roy chuan September 8 khan a sawi.

He system hian digital hmangin bungraw phur lirtheite a endik dawn a, an bungraw phurhte chu kimchang takin a hriat theih dawn a ni. Hei bakah Tripura-a lirthei lut tur, ṭul loa dintir leh tihkhawtlai an nih ṭhin a titawp dawn bawk. Singha Roy chuan he scanner hian lirthei kaihhnawih kimchang a hre thei dawn a, bungrua an phurte leh lirthei khalhtute bakah a khalhtu hming leh chenna a hriat theih dawn tih a sawi. Information an lakkhawmte chu Agartala-a sorkar headquarter-ah direct-a thawn a ni dawn a ni.

Minister chuan lirtheite ṭul loa tiding loa awlsam zawka scan a nih theihna tur kawng an dap tih, Agartala-a Pragna Bhavan-a NextGen HRMS hnuaia module thar pali State-Level Launching Programme-ah a sawi. Scanner system hmang hian sorkarin Tripura-a lirthei lutte record dik tak a neih theih nan a pui thei dawn tih a sawi bawk. He technology hian lirthei tlan endik kawngah a pui thei dawn a, dan phal loh bungraw phurh luh hmuh chhuah kawngah a pui dawn tih a sawi bawk.