Nagaland: SC leh ST damloten inenkawlna Rs nuai 3.5 dawng dawn

Nagaland-a Scheduled Caste (SC) leh Scheduled Tribe (ST) zinga damlote chuan, an inenkawlna senso atan Dr Ambedkar Medical Aid Scheme, 2026 hnuaiah Rs nuai 3.5 an dawng dawn. Dr Ambedkar Foundation hi Union Ministry of Social Justice and Empowerment hnuaia kalpui a ni a, scheme siamṭhat hian SC leh ST-a damlo, natna khirh tuarte puihbawmna a pe dawn a ni.

He scheme-a inkaihhruaina dan siam thar hnuaiah hian, SC/ST zinga kum khata Rs nuai 5 aia tam lo lutte chuan natna khirh, inzai emaw enkawl bik ngai natna neite tan dil theih a ni. He scheme hnuaiah hian kal, thin, cancer leh thluak kaihhnawih natna, taksa peng thlak, spinal surgery leh nunna atana hlauhawm natna neite a huam a ni. Scheme hnuaia sum pek chhuah tam theihna ber chu kal surgery/dialysis leh kal emaw taksa peng emaw thlakna atan niin Rs nuai 3.50 thleng pek theih a ni a, cancer surgery, chemotherapy leh radiotherapy atan Rs nuai 2.50, thluak surgery leh nunna atana hlauhawm natna neite tan Rs nuai2 leh, thin leh spinal surgery atan Rs nuai 1.50 pek theih a ni bawk.

Scheme hian inzai senso tur ruahman zinga 100% a tumsak thei dawn a, sum pawmpui zat chu damdawi-in hnenah direct-in pek chhuah a ni ang. PM-JAY hnuaia hamṭhatna dawngtute chuan kal emaw taksa peng thlak ngaiten an dawng thei bawk dawn a ni. He inkaihhruaina siamṭhatah hian scheme hman theihna damdawi-in pawh puan nghal a ni a, chungte chu New Delhi-a AIIMS leh state danga AIIMS, Lucknow-a Sanjay Gandhi Post Graduate Institute, Patna-a Patna Medical College Hospital, Jabalpur-a Jabalpur Hospital and Research Centre, Guwahati-a B. Barua Cancer Institute leh damdawi-in dang eng emaw zat an tel a ni.