Meghalaya: East Khasi Hills-ah street performance neih khap

East Khasi Hills-a sumdawnna hmun huam chhunga loudspeaker, amplifier leh thawm bengchheng siamna hmanrua dangte hmanga street performance neih khap niin, district thuneitu chuan thawm bengchheng siama performance neih ṭhinte khapna thupek a tichhuak.

East Khasi Hills district magistrate, Abhilash Baranwal-a'n September 9-a Noise Pollution (Regulation and Control) Rules, 2000 hnuaia thupek a tihchhuah hi hman ṭan nghal niin, sumdawnna hmun leh a chhehvel kawng dunga performance neih ṭhin pawhi phalna pek chin aia thawm ring an chhuah ṭhin nia sawi a ni. DC chuan thuneitute phalna la hmasa loa mipui vantlang bazarna hmuna single-stage microphone leh, multi-stage amplification, bluetooth speaker leh sound box hmante a khap.

DC chuan performer-te chu acoustic, unplugged leh non-electronic emaw, non-amplified musical instrument hmang turin a hriattir a, ke a kalna, GS Road leh market corridor-ahte performance neih a khap bawk. Acoustic hmanga perform-na hmun tur bik ruahman a ṭul thu leh, cultural zone-ahte sawn a nih maitheih thu a sawi. He kapna hi Noise Pollution (Regulation and Control) Rules 5(1) leh 5(2) hmanga siam a ni a, vantlang hmuna loudspeaker leh hmanrua dangte hman a nih dawn chuan phalna lak hmasak a ngai a ni.

Meghalaya State Pollution Control Board (MSPCB) chu he thupek hi tihhlawhtlin leh, sumdawnna hmuna thawm siamte endik tura tih an ni. Dan zawm lote chu Environment (Protection) Act, 1986 Section 15 hnuaiah hremna lekkawh tura hriattir an ni bawk. He thupek hi hman ṭan nghal niin, East Khasi Hills district pumah hriattirna dang tihchhuah a nih hma chuan hman a ni ang.