Sikkim: Gyalshing district-a leimin vangin mi 128 sawn chhuak

Sikkim-a Gyalshing district-ah ruahsur nasa avangin Singlitam leh, Rimbi-ah leimin nasa tak a thleng a, chhiatna thleng vang hian Rimbi-a chenna in 28 aṭangin mi 128-te chu sawn chhuah an ni. Leimin thlenna hmunah hian kawng siamṭhat, chhawmdawlna leh venhimna kawngah hma lak zui a ni.

Sikkim State Disaster Management Authority (SSDMA) chuan September 12 khan leimin hi report a nih thu leh, leimin hian chenna in leh vantlang infrastructure a tichhe nasa hle tih sawiin, district thuneitu leh a kaihhnawih department hrang hrangte chuan darkar 24 chhung enfiah leh chhan chhuah hna an thawk a ni. Gyalshing district collector, Tenzing Denzongpa chuan Singlitam leh Rimbi-a leimin thleng chu finfiahin vawi eng emaw zat a tlawh tawh a, vantlang leh sorkar bungrua a tihchhiatte a endik bawk.

Singlitam-ah hian chenna in pasarih leiminin a tihchhiata chengte chu Singlitam Ward-a relief centre-ah awm lailawk tir an ni. Helai hmunah hian mi 33 an awm mek a, an zingah hian kum upa lam leh naupangte pawh an tel. District thuneitu chuan ei leh in bakah, mamawh dangte a pe a ni. Rimbi-ah hian thuneitute chuan chenna in palia chhungkaw member 18-te chu hmun himah an sawn chhuak bawk, Leimin tuar chungkuate chu an chhung hnaivaite chenna inah sawn an ni a, an mamawh tur angte pek an ni.

September 14-a ruahsur nasa leh tuilian vanga Rimbi-a chhiatna thlen dan dinhmun chu endik niin, tun dinhmunah chenna in 28-a mi 128-te chu sawn chhuah an ni tawh a, Rimbi Gram Panchayat Kendra (GPK)-ah awm lailawk tir an ni. Roads and Bridges department chuan leiminin a tihchhiat siam ṭhat hna an thawk nghal a, lirthei tlan dan turah ruahmanna an siam bawk.