Meghalaya: CM-in mobile medical units vailiam

Meghalaya chief minister Conrad K Sangma chuan nimin, September 15 khan state chhunga hmun hla leh tlawhpawh harsaa chengten healthcare ṭha zawk an neih theihna tura hmalaknaah, Mobile Medical Units (MMUs) a vailiam. Unit-te hi Sohra, Pyrnursla leh Baghmara-a khaw 93-ah hman a ni dawn a, mipui nuai 2 chuangin an chhawr ṭangkai thei dawn a ni.

MMU tinte hian doctor leh paramedic an nei dawn a, medical facility neih ṭhat lohna hmunah healthcare service changtlung tak an pe dawn a ni. CM Sangma chuan he hmalakna hi sorkarin Smart Village movement a kalpui peng pakhat a nih thu leh, technology changkang leh ṭha zawk hmanga hriselna lam service thuam chak leh tihphuisuina tur a nih thu a sawi.

Sangma chuan a social media X-a thuchhuah a siamah, healthcare service chu hmun hla leh tlawhpawh harsaah pawh harsatna awm loin a thleng tur a ni, a ti. He hmalakna hlawhtlinna chu a tlangzarhna aiin nghawng ṭha a neih danah a innghat dawn tih a sawi bawk. He hmalakna tehfung dik tak chu vailiamna programme ni loin, damlo enkawl leh a bulṭhut aṭanga healthcare service thuam chakna tur a ni, tiin mobile unit enkawltu team-te chu duhsakna a hlan bawk.