Assam: Viksit Assam 2047 hnuaiah Rs vbc 50,000 investment neih tum

Assam sorkar chuan Viksit Assam 2047 vision hnuaiah, state chhungah Rs vbc 50,000 hu investment neih tumin ruahmanna siam mek a ni tih chief minister Himanta Biswa Sarma chuan Jorhat-a ni hnih awh, District Commissioners’ Conference neih zawhah a sawi.

Conference hi September 14 zanlai khan zawh fel a ni a, district level-a hmasawnna project hrang hrang bakah, sorkar scheme leh public service pek chhuah tihchangtlun dan tur sawi ho a ni. CM Sarma chuan investment atana ruahmanna an siamah, sorkar infrastructure project hrang hrang, Anganwadi centre sak, stadium thar sak leh zirna in, sikul aṭanga university thlenga infrastructure tihchangtlunnate a tel dawn tih a sawi. District Commissioner-te hnenah an district enkawl tana project ruahmante hrilhhriat a ni bawk.

He conference-a thu pawimawh an sawi ho zingah, secondary level-a zirlai zirna chawlhsan tihtlemna tur pawh telin, sorkar scheme hrang hrangte leh public service kalpui dan an thlirlet bawk. TB Mukt Bharat Abhiyan hmalakna kal zel dan te, medical college thar sak tumna leh, health sub-centre 4,000 chu damdawi-ina thlak tum a nih dante zirchian a ni a, hei hi state budget provision-ah puan a ni. Meeting-ah hian Khel Maharan neih tur atana inbuatsaihna leh, tun hnaia tuilianin a tihchhiat embankment siamṭhat a nih dante sawi ho a ni. State sorkar Sankalpa Patra-a programme tarlante kalpui dan tur an sawi ho bawk a ni.