Arunachal: FCRA dan bawhchhiatna nia sawiah activist Bhanu Tatak man

Central Bureau of Investigation (CBI) chuan Arunachal Pradesh ukil leh environmental activist, Bhanu Tatak chu Foreign Contribution (Regulation) Act (FCRA) bawhchhiain rampawn aṭangin sum a dawng nia sawi a nih avangin an man tih official-ten an sawi. Tatak hi Siang Indigenous Farmers’ Forum (SIFF) leh civil society pawl, Dibang Resistance nena thawk ho an ni a, Arunachal Pradesh-a hydropower project kalpui tura rawtna siam duh loh lantira nawrh huaihawtnaah a inhnamhnawih a ni.

FIR hi August 20 khan theh luh a ni a, Tatak hian FCRA hnuaiah registration emaw, phalna la hmasa loin a mimal bank account-ah direct-in rampawn aṭangin pawisa a dawng tih tarlan a ni. Kum 2022 leh 2025 inkarah State Bank of India-a a account-ah rampawn aṭanga thawn, Rs nuai 20.94 a dawng tih hmuh a ni. Agency hian ram pawna pawl leh mimal eng emaw zat aṭangin sum an dawng tih an tarlang a, chung zingah chuan Philippines-a Asia Indigenous Peoples Network on Extractive Industries, Energy and Indigenous Peoples Rights International, Ireland-a Front Line leh UK-a Human Rights Resource Centre-te pawh an tel.

CBI chuan rampawn aṭanga sum a dawn hi Siang Upper Multipurpose Project (SUMP) leh, Dibang Multipurpose Hydropower Project thawh tur dodalna atana hman a nih tarlangin, hetiang thil hian ram economy leh hmasawnna a nghawng tih an sawi. CBI chuan Tatak hian kum 2017-18 leh 2025-26 inkar khan income tax return a theh lut lo niin an puh bawk a, foreign receipt nia sawite chu official record-ah tarlan a ni lo, a ti. He thubuai hi Ministry of Home Affairs (MHA) thupek angin, CBI-in chhui chianna a neih hnuah ziah luh a ni.