Assam: CM-in ṭhalai entrepreneur 82,219 hnenah Rs vbc 278 sem

Assam chief minister Himanta Biswa Sarma chuan September 17 khan, Chief Minister’s Atmanirbhar Asom Abhijan (CMAAA) 1.0 leh 2.0 hnuaiah state chhunga ṭhalai entrepreneur,mi 82,219 te hnenah sum lama ṭanpuina Rs vbc 278 a sem. Sorkarin ṭhalaite zinga kut kawih eizawnna (entrepreneurship) leh, mahni inrintawkna neih a ngaih pawimawh thu a sawi.

Jyoti-Bishnu Antarjatik Kala Mandir, Khanapara-a ṭanpuina sum semna inkhawma thu a sawiah, Sarma chuan he hmalaknain a tum ber chu sum leh paia ṭanpuina pek mai ni loin, ṭhalaite chu mahni inrintawkna an neih theihna tur leh, entrepreneur hlawhtling tak ni tura fuihna a nih thu a sawi. He scheme hnuaiah hian General Category-a entrepreneur-te chuan Rs nuai hnih an dawng a, hetah hian 50% grant leh 50% interest-free loan a tel. Professional Category hnuaia awmte chuan Rs nuai 5 an dawng a,50% grant leh 50% interest-free loan a tel bawk.

CMAAA 1.0 leh 2.0 hnuaiah entrepreneur 82,219 an awm a, CMAAA 1.0 hnuaiah general-category entrepreneur 9,552 leh professional-category entrepreneur 26 awmin, CMAAA 2.0-ah hian general-category entrepreneur 72,447 leh professional-category entrepreneur 194 an awm thung. Programme-a a lan danin CMAAA 1.0 hnuaiah Rs vbc 196 chuang sem chhuah a ni a, CMAAA 2.0 hnuaiah rs vbc 182 chuang sem chhuah a ni. Sarma chuan sorkarin ṭhalai entrepreneur-te hnenah Rs 75,000 a lo pe tawh chhuak tawh tih sawiin, hemi hnuah Rs 25,000 a pe chhuak leh bawk a ni.