Prime Minister-in Assam tlawh dawn

Prime minister Narendra Modi chuan February 7 hian Assam a tlawh dawn. 

Sorkar laipui, Assam sorkar leh Bodo helpawlten inremna an siam tak, Bodo peace accord lawmna, Kokrajhar-a neih tura telpui turin PM hi a zin dawn tih Assam finance minister Himanta Biswan Sarma chuan a sawi. 

Minister Sarma hian PM rally neihna tura inbuatsaih dante enfiahin Kokrajhar hi a lo tlawh tawh bawk a ni. 

Bodo­land Territorial Council hotu Hagrama Mohilary, Rajya Sabha MP Bisjwajit Daimary leh All Bodo Students Union hruaitute pawh kawmin, prog­ramme neih dan turte a sawipui tawh a ni. 

January 27 khan Bodo peace accord hi ziah a ni a,  he inremna ziah hnuah Bodo helpawl, National Democratic Front of Bodoland (NDFB) hnuaia pawl pathuma hel 1,615 te chu an ralthuamte nena sorkar kutah an inpe tawh a ni. 

Assam sorkar hian PM Modi hi January 10 khan Guwahati-a 'Khelo India' games an thlen chu hawng turin a lo sawm tawh a, mahse hetihlai hian Assam-ah Citizenship Amemdment Act (CAA) dodalna lantira nawrh huaihawt runpui  lai a nih avangin PM hian a kal tur hi a ṭhulh a ni.