Assam: Gurugram tualthah thubuaia man damchhung lungin tang turin hrem

Assam-a Gurugram court chuan Assam mi pakhat, kum 2023-a a chenpui hmeichhia thattu chu thiam loh chantirin dam chhung lung in tantir bakah, Rs 50,000 chawi turin a ti. Thiam loh chantir hi kum 31 mi Mukesh niin, Assam-a Bhuragaon khua ami a ni a, kum 2023 February 20-a inchung aṭanga a tlak avanga thi, domestic worker Kalpana thihna kaihhnawihah thiam loh chantir a ni.

Sector 14 police station-a Kalpana laizawnin complaint a thehluhah, Gurugram-ah hian Kalpana hian kum ruk aṭanga kum sarih chhung domestic worker hna a thawk tawh tih tarlan a ni. Kum 2023 January thla aṭang khan Delhi-a Khanpur huam chhunga hostel-ah a awm ṭan a, hna dang thawk tura a inbuatsaih mek lai a ni bawk. February 10 aṭangin Mukesh-a bulah hian a khawsa nia sawi ni a, February 18 kha a laizawn a biak hnunghnung berna a nih thu a sawi.

Hemi ni aṭanga ni hnih liam hnuah, Kalpana hi a chhungte hnenah a intihlum tih hriattir an ni a, a laizawn chuan inchung sang ber aṭangin a tla tih a hriat thu a sawi. Complaint theh luttu hian he thil thlen lai hian Kalpana hi Mukesh-a bulhnaiah awmin, mahni intihlum ni loa thah a nih a rinhlelh thu a sawi a ni. Hemi hnuah thudik tak chhui chiang turin ngenna a siam a, FIR theh luh a nih hnuah hemi ni vek hian Mukesh-a hi man a ni.

Zirtawpni liam ta khan police-te evidence leh witness testimony an pekte ngaihtuah a nih hnuah court chuan Mukesh hi thiam loh chantirin, dam chhung lung in tang turin a chungthu a rel a, Rs 50,000 chawitir a ni tih Gurugram Police thupuangtu chuan a sawi.