Manipur: NRFM bandh huaihawtin nunphung tibuai

Manipur state puma nimin Thawhṭannia National Revolutionary Front Manipur (NRFM)-in 1949 Manipur Merger Agreement dodalna atana darkar 24 chhung bandh an huaihawt chuan nunphung a tibuai hle. Shutdown hi September 20 zanlai aṭang khan puan a ni a, September 21 zanlai thleng chhunzawm a ni.

Bandh huaihawt a nih hma hian Manipur Police Special Commando Unit leh 10 Assam Rifles joint team chuan NRFM cadre nia sawi an man bawk. An mi man hi Imphal West-a Haorang Khunou Warok Sabal-a cheng, N. Meipak ​​Singh-a fapa, kum 39 mi Namoijam Boboi Mangang a ni a, Lamphel police station hnuaia Regional Institute of Medical Sciences (RIMS), Lamphel-a Gate 1 bulah man a ni. Bandh hian nitin khawsak phung nghawngin, zirna in, bank, dawr, sumdawnna hmun leh mimal office-te chu khar a ni. Public transport khawlaia tlan an awm lo a, security lirtheite an patrol a ni.

Shutdown hi puan chhunzawm a nih avangin sorkar office hnathawk kal an tlem hle bawk. Inter-state road transport pawh tihtawp lailawk a ni a, Manipur leh ramchhung hmun dang inkalpawhna pawh khar lailawk a ni bawk. Airline service erawh chhunzawm a ni thung. Bandh huaihawt hian valley district a nghawng nasa zual a, hill area-ah erawh buaina an tawk lo nia sawi a ni. Service pawimawh tak tak; healthcare, fire service, tui supply, media leh sakhaw thila function hrang hrangte erawh shutdown hian a huam lo.

NFRM hi kum 2011 September 11 khan din a ni a, Manipur-a hmalakna an kalpui rualin ram pawn aṭangin hna an thawk nia sawi a ni a, an pawl hian Manipur-a inrelbawlna siamṭhat an phut a ni. Bandh hi state chief minister Yumnam Khemchand Singh-a'n civil society pawlte leh mipuite chu nawrh huaihawt lo tura a ngen chung pawhin a thleng tho a ni. Chief Minister chuan shutdown puan hian nitina eizawng, zirlaite leh khawtlanga mi harsa zawkte tan harsatna lian tak a thlen thu a sawi.