Arunachal: CM-in SUMP dodaltu official-te hrem turin ti

Arunachal Pradesh chief minister Pema Khandu chuan, Chief Secretary chu sorkar hnathawk leh official zinga MW 11,000-12,500 Siang Upper Multipurpose Project (SUMP) ruahman mek dodaltu nia sawite lakah hma la turin a hriattir. Khandu chuan Thawhṭannia Siang leh Upper Siang district-a official-te nen meeting an neihnaah he hriattirna hi a puang a ni.

CM Khandu chuan project dodaltu sorkar hnathawk leh official zawng zawngte chungah hremna pe turin Chief Secretary hnenah thupek a tihchhuah thu leh, sorkar hnathawkte chuan sorkar thupek an zawm ngei tur a ni tih meeting neih zawhah a sawi. SUMP chu ram pum huap project a nih thu leh, tualchhung mite hnenah a pawimawhzia zirtirna leh hriattirna pe tura sorkar officer-te leh hnathawkte chanvo pawimawhna a sawi bawk.

Tribal society-ah chuan officer-te leh sorkar hnathawkte hian hmun pawimawh tak an chang a, tualchhung mipui, chhung hnaivai leh ṭhiante hnenah a pawimawhzia puan chhuah a, ram hmasawnna leh ṭhanlenna tur atana thil ṭangkai a nihna tarlan a ṭul tih CM chuan a sawi. Khandu chuan sorkarin awareness campaign a buatsaih tur thu leh, Siang leh Upper Siang district a tlawh thuai tur thu sawiin, tualchhung mipuite leh sorkar hnathawkte nen inbiakna an nei dawn a ni. Mipuite chu project chungchangah hriatthiam loh an nei a nih chuan, zawhna siam turin a chah bawk a ni.