Judicial infrastructure thuam chak tum a ni: Sikkim CM

Sikkim chief minister Prem Singh Tamang chuan September 21, Thawhṭanni khan sorkarin state puma judicial infrastructure thuam chak a tum tih sawiin, a bikin hmun hla leh tlawhpawh harsa thingtlang lama chengten rorelna dik an hmuh theihna tura hma lak a ni dawn tih a sawi. Tamang chuan he thuchhuah hi Sikkim High Court chief justice, A Muhamed Mustaque nen Namchi-a Additional Court of the District and Sessions Judge an hawnnaah a sawi a ni.

CM Tamang chuan subdivision hrang hranga court din a nih chuan, mipuiten rorelna dik an hmuh theihna turin hmun hla tak tak an pan a ngai tawh dawn lo tih a sawi. Justice system rintlak leh awlsam zawka pan theih din a nih chuan, mipuiin an dikna chanvo humhim bakah, a hun taka rorelna dik an neih theihna tura an inrintawkna a tichak dawn a ni, a ti. Dikna chanvo chungchanga rorelna ṭha neih chu thil pawimawh tak a nih thu a sawi bawk. Tamang chuan sorkarin vantlang institution-te chu a bikin hmun hla leh thingtlang lama chengte chhawr ṭangkai theih tura siam chhunzawm zel a ni dawn tih a sawi.

Chief Minister chuan High Court Justice kaihhruainaah leh, state puma judicial system tihchakna tur a thlawp avangin lawmthu a hrilh. System thlak danglam chungchang pawh sawilangin, Courts of Sikkim rule 4/4 hnuaia appointment system-ah Sikkim mi candidate-te dah pawimawh ber an ni. Tamang chuan Soreng leh Pakyong chu district thar atana siam a nih avangin inrelbawlna, service pawimawh leh hmasawnna kawng hrang hrang a tichak tih a sawi bawk.