Assam: Sorkar office-ah e-Office system hman a ni dawn

Assam sorkar chuan state chhunga sorkar office zawng zawngte chu e-Office system hnuaiah, nakkum January 1 aṭang hian paperless-a kalpui vek tura hriattirin, he hmalakna hi inrelbawlna kalphung digital a thlak danglam tumna a ni. Chief Minister's Office (CMO) chuan he thu hi Nilaini September 23 khan puangin, Assam-a digital hmanga inrelbawlna thlak danglamna tura hmalakna a ni.

Thuchhuahah chuan chief minister Himanta Biswa Sarma kaihhruaina hnuaiah, sorkar office zawng zawngte chu paperless 'e-Office' system-a kalpui a ni tawh dawn a; public service pek chhuah kawnga langtlang, rintlak leh mipui ngaih pawimawh lehzualna tur a ni tih an tarlang. State-ah hian National Informatics Centre (NIC) siam e-Office platform chu Assam Secretariat pumah hman ṭan a ni tawh a, tun dinhmunah Secretariat-a department 58-in he system hi an hmang mek.

e-Office system hian lehkhapuan (paper) hmanga file buaipui ngai tawh loin, electronic hmangin hna chak zawkin a kalpui thei dawn a ni. Sorkar office-te chuan digital hmangin document an dawnte dah ṭha thei dawn a, electronic hmanga file siam, online-a note leh draft buatsaih, digital hmanga sign leh archive theihnate a awm bawk. Platform hian official-te chu an hna chet vel dan leh dinhmun a thlithlai thei dawn bawk a ni. NIC chuan he system hian hnathawh a tihawlsam bakah, physical file-a innghahna a titlem tih an tarlang.