Nagaland: Governor-in NPSC hnathawh dan thlirlet

Nagaland governor Nand Kishore Yadav chuan Thawhlehni khan, Kohima-a Lok Bhavan-ah Nagaland Public Service Commission (NPSC) hnathawh dan a thlirlet a, commission chuan an exam system tihchak dan tur, digital process huang zauh leh, infrastructure mamawhna sang zel chungchangte sawilan a ni.

NPSC official-te chuan Governor chu an commission chanchin, an dinhmun, hnathawkte dinhmun leh hna an kalpui dante an hrilh a, hei bakah exam kaihhnawih, department promotion committee meeting, hmalakna kal mek, hlawhtlinna an neihte leh, harsatna leh hun lo awm tur atana ruahmanna an neihte an hrilh a ni. Commission chuan Nagaland Civil Service (NCS), Nagaland Police Service (NPS) leh service dangte syllabi leh exam pattern siamṭhat a nih tur thu an tarlang bawk.

Hei bakah Combined Technical Services Exam atana syllabus leh exam pattern siam tharte an tarlang bawk a, service atan hian three-tier examination system hman tum a ni bawk. NPSC chuan technology leh digital an hman dan an tarlang bawk. Union Ministry of Electronics and Information Technology chuan DigiLocker nen recruitment portal an kalpui avangin lawmthu sawina atan certificate a hlan tih an sawi.

Commission chuan Nagaland chu hmarchhak biala DigiLocker leh eSign model hmang hmasa ber an nih thu leh, ramchhungah he system hmang state zinga pathumna an nih thu an sawi. NPSC chuan he hmalakna hi paperless process tihhmasawn leh, digital public service infrastructure thuam chakna tura hmalakna a nih thu an sawi a ni.