Assam CM-in PM Modi leh Amit Shah a hmu
Assam chief minister Sarbananda Sonowal chuan Ningani khan prime minister Narendra Modi leh union home minister Amit Shah te chu a hran ve vein a hmu.
PM Modi chuan Assam CM hnenah hian sorkar laipui leh Naga helpawl, NSCN-IM ten inremna an ziah turah Assam leh state mipuite duhdan chu a ngaihtuah tel dawn tih leh, thutlukna siam hmain Assam, Manipur leh Arunachal Pradesh a rawn leh phawt tur thu a hrilh a ni. Sonowal hian Naga peace accord siam turin Assam mipuiten an ngaihven hle tihte a hrilh a, hei bakah hian an state mamawh hrang hrangte a sawipui nghal bawk.
Assam chief minister chuan Jagiroad-a Nagoan Paper Mill leh Panchgram-a Cachar Paper Mill te tharthawh leh dante PM hi a sawipui a, hma lak pui turin a ngen. Hei bakah hian Numaligarh Refinery Limited tihlen dan tur buaipui mekah PM puihna hi a ngen bawk a ni. PM pawhin a theih anga lo puih zel a intiam.
Sonowal hian PM chu nakkum January 10 aṭanga Guwahati-a Khelo India Youth Games neih tur hawng turin a sawm nghal a ni. Ningani vek khan Assam chief minister hian union home minister Amit Shah chu a chenna inah a hmu bawk. Home Minister hian Naga peace accord siam turah Assam mipuite duh lo zawnga engmah siam a nih lo tur thu Sonowal hi a hrilh a ni.