Tripura-in Bru raltlante ei tur pek chhunzawm zel dawn

Tripura-a Bru raltlanten sorkar laipui aṭanga a thlawna ration an dawn ṭhin tihtawp a nih avanga  ni riat zet kawngpui danga nawrh an huaihawt hnuah, Ningani khan Group of Ministers (GoM) in ei tur pek chhunzawm a tiam hnuah nawrh an titawp ta. 

Tripura deputy chief minister Jishnu Dev Varma chuan ration leh an mamawh dangte pek chhunzawm tiam a nih hnuah, Bru raltlante hian Kanchanpur-a kawngpui pawi-mawh an dante an titawp ve nghal tih a sawi. Dev Varma chuan raltlante hnena chaw leh mamawh dang supply hna hi nimin aṭang khan kalpui nghal a nih thu leh, November 30 thleng pek phawt an nih tur thu a sawi. 

GoM-ah hian Tribal Welfare Minister Mevar Kumar Jamatia, Law and Education Minister Ratan Lal Nath, Social Welfare Minister Santana Chakma, leh MP pahnih Pratima Bhowmik leh Rebati Tri­pura-te an tel a, Ningani khan raltlan hruaitute hi an hmu a ni.