Meghalaya: CM-in Shillong Technology Park-II a hawng

Meghalaya chief minister Conrad K Sangma chuan Rs vbc 121 senna, Umsawli-a New Shillong Township-a Shillong Technology Park-II chu September 23 khan a hawng. He technology park-ah hian technology space square feet nuai 1.8 a zau a awm a ni.

CM Sangma chuan Meghalaya-a company-te chu multinational firm-te nen an awm ho avangin technology park hian tualchhung sumdawngte chu ram pawn lam aṭanga dawr theih tura a puih tur thu a sawi. Shillong-a IT park emaw innovation hub emaw din tumna chu kum 2008 khan ngaihtuah a nih tawh thu leh, tuna hawn a ni ta chu suangtuahna thleng dik a nih thu a sawi. Hei bakah Sangma chuan state economy chu kum 2018 aṭang khan a let hnihin a pung tawh tih sawiin, kum 2032-ah a let hniha tihpun leh tum a nih thu a sawi bawk.

Sorkarin infrastructure leh inkalpawhnaa investment a neih thu leh, chung zingah chuan Secretariat thar leh New Shillong-a administrative city-te pawh an tel tih a sawi. Hei bakah hospitality infrastructure huang zauh, Shillong Airport runway tihzauh leh Shillong leh Guwahati inkalpawhna kawng siamṭhatte pawh an tel. CM Sangma chuan state technology sector ṭhanlenna atan hnathawk mamawh belh zel an nih thu a tarlang. Meghalaya State Skill Development Mission, Meghalaya Skills programme, Government engineering college leh skill university din tum a nih bakah, hmalakna hrang hrang hmangin sorkarin skill development a thlawp thu a sawi a ni.