Kargil to Kohima Glory Run zo ta

Ultra-marathon, 'Kargil to Kohima Glory Run' chu ni 45 chhunga km 4,500-a thui an tlan hnuin Nilaini khan Kohima War Cemetery, Nagaland-ah an tlan zo ta. 

September 21 khan Air Vice Marshal PM Sinha, Air Officer Commanding J&K chuan Kargil War Memorial, Dras aṭangin 'Kargil to Kohima Glory Run' a tlan turte hi a vailiam. Air force 25 leh midang pasarih an tel a, Nilaini khan heng mite hi Air Marshal RD Mathur, AOC-in-C Eastern Air Command chuan Kohima-ah lo dawngsawngin a lawmna hun tawi buatsaih a ni. He hun hi Nagaland governor RN Ravi leh official eng emaw zatin an telpui. 

He ultra-marathon a tel, air force team leh midangte hian ni khatah kein km 100 zel an tlan a, an tlanna kawngah hian zirlaite an kawm kual nghal a ni. Tlante hi kum 21-51 inkar an ni, hmeichhe pakhat a tel ve bawk.