Arunachal: Sorkarin bank nawrh huaihawt hmain hlawh pek remti

Arunachal Pradesh sorkar chuan ni thum chhung bank nawrh huaihawt a nih dawn vangin, September thla hlawh leh pension hamṭhatnate chu nawrh huaihawt a nih hmaa pek chhuah a remti tih official-te chuan nimin September 25 khan an sawi.

Hlawh pek chhuah hma a nih theihna tur hian phalna pek a ni tawh a, sorkar hnathawk pangngai bakah casual, contingency leh contractual staff-te a huam a ni. Pensioner leh retirement hamṭhatna dawng turte pawhin he thupek hnuaiah hian an pawisa an dawng dawn a ni. He thutlukna hi joint secretary (Budget), Ikar Birchi chuan Ningani khan Ministry of Finance-in hriattirna a tihchhuah hnuah, September 28 aṭanga 30 chhunga nawrh huaihawt tum a nih avangin bank service-ah buaina a thlen theih avangin a tichhuak a ni.

Sorkar chuan treasury leh sub-treasury officer, drawing and disbursing officer (DDO) leh regional banking thuneitute chu thupek anga hlawh pek chhuah hma kalpui a nih theihna atan a hriattir a ni. He nawrh huaihawt hi bank employee union eng emaw zat aiawhtu United Forum of Bank Unions (UFBU) huaihawt a ni. Union thil phut pawimawh zingah karkhata ni nga chhung hna thawha, Inrinni apiang chawlh puan pawh a tel. Reserve Bank of India, sorkar laipui office leh insurance sector-te hnathawh dan zulzuia thawh an phut bawk.