Manipur: COHSEM-in HPC leh ITMS tlangzarh

Manipur chuan National Education Policy (NEP) 2020 hnuaia sikula competency-based assessment tihchakna turin, secondary-stage zirlaite tan Holistic Progress Card (HPC) leh Integrated Test Management System (ITMS) a kalpui. Heng hmalakna pahnihte hi Council of Higher Secondary Education, Manipur (COHSEM) chuan Ningani khan Imphal-a Classic Grande-a programme buatsaihah a tlangzarh a ni. He hmalakna hi PARAKH-NCERT, New Delhi kaihhruaina hnuaiah kalpui a ni.

HPC hi state puma sikul 46-ah phase hrang hranga kalpui a ni dawn a, NCERT-PARAKH framework hnuaia siam, progress card-ah hian zirlaite zirna leh hmasawnna document-a dah ṭhat a ni dawn a ni. Secondary stage-ah chuan HPC hi formative leh continuous assessment-ah hman a ni ang. COHSEM buatsaih Higher Secondary Education exam chu chhunzawm a ni bawk ang.

360-degree assessment framework hian zirlai hmasawnna hrang hrang a huam dawn a, chung zingah chuan mahni inrintawkna, hun hman dan, hmalam hun atana ruahmanna, thiamna tihpun, project hnathawh, classroom participation leh, online bakah thildang zirte pawh a tel a ni. Integrated Test Management System-ah erawh chuan, competency-based question bank siam leh enkawlna atana digital platform hman a ni thung. Summative exam-a competency-based assessment tihchak leh testing practice-te chu NEP 2020 thil tum nen inmil tir tum a ni.