Rualbanlote tana service-in khaw hrang hrang a thleng tur a ni: Nagaland Governor

Nagaland governor Nand Kishore Yadav chuan rualbanlote tana service chu state leh district headquarters piah lama kalpui turin a ngen a, state puma rualbanloten zirna, hriselna, eizawnna leh public service intluktlang taka an dawn theihna tura hmalak a ṭul thu a sawi.

Nagaland Parents Association for the Disabled (NAPAD) buatsaih, 100th Regional Parents’ Meet 2026-a thu a sawiah, Yadav chuan rualbanlote enkawl chu an chhungte mai bakah, thawh hona leh inlungrualnaa kalpui tur a nih thu a sawi. Zirna, hnathawh tur leh vantlanga mawhphurhna an neih theihna tura ṭan lak a ṭul thu a sawi bawk.

Yadav chuan sikul, public building, transport system, hnathawhna hmun, digital platform leh community space-te pawh a huam tel a ngai tih a sawi. Sorkar, zirna in, healthcare provider, hnathawhna hmun, civil society group leh tualchhung mite nen lungrual taka hmalak a phut bawk.

Rualbanlote chu a rang lama hriat chhuah leh enkawlna pek hma a pawimawh thu sawiin a hun taka ṭanpuina an dawn theihna turin chhungkua, Anganwadi centre, sikul, health worker leh medical professional-te inkarah thawhhona ṭha neih a ṭul tih a sawi. Khawtlangin rualbanlote chungchanga ngaihdan a neihte thlak danglam turin a ngen bawk a, rualbanlote chu lainatna chauh ni loa, an dikna chanvo leh puih an mamawhnaa ṭanpui a ṭul thu a sawi. An thil tawnhriatte chu policy leh programme-ah a lang chhuak tur a ni, a ti.