NRC Coordinator thar atan Hitesh Dev Sarma ruat

Assam sorkar chuan state civil services officer Hitesh Dev Sarma chu National Register of Citizens (NRC) coordinator thar atan a ruat. Sarma hian vawiin aṭangin a hna thar hi a chelh ang. 

Supreme Court chuan NRC coordinator Prateek Hajela chu sawnin, Assam sorkar hnenah a thlaktu tur atana a rawt, officer hmingte thehlut turin a hriattir a ni. Sarma kaihhruaina hnuaiah Assam NRC final list chu kumin August 31 khan tihchhuah a ni. Mahse list tihchhuahah hian mi maktaduai 1.9 zet an tel loh avangin sawisel a hlawh hle a, thubuai pawh thehluh a ni. Hei vang hian SC pawhin Hajela hi a sawn phah nia ngaih a ni. List-a tello hian Foreigners Tribunal an dil leh thei dawn a, hei hi tun thla hian kalpui ṭan a ni ang. 

NRC Coordinator thar tur, Hitesh Dev Sarma hi state finance and urban development department secretary ni lai a ni a, NRC kalpui ṭantirh lamah a lo buaipui tawh a ni. Madhya Pradesh mi niin, 1995-batch Indian Administrative Service officer, Assam-Meghalaya cadre a ni. Delhi-a Indian Institute of Technology aṭangin Electronics-ah B.Tech degree a zo a ni.