Nov 23 aṭangin Imphal-Mandalay thlawhtheihna service dawn

Manipur khawpui, Imphal leh Mandalay, Myanmar  inkarah November 23 aṭangin thlawhtheihna service tir a ni dawn. 

International flight hi Manipur-a tourism festival lian ber, Manipur Sangai Festival ṭan hma niin thlawh tir ṭan a ni ang. He festival hi ni sarih awh tur a ni a, a chhim tur hian rampawn lam aṭangin pawhin khualzin eng emaw zat an tel beisei a ni. 

Chief minister N Biren Singh chuan kar liamtaa Imphal-a flight service tana online ticketing portal a hawn rualin, Imphal leh Mandalay inkar thlawhtheihna service tir tur hi a puang nghal a ni. Thlawhtheihna hi Yangon, Myanmar-a private airline Air KBZ in a thlawh tir dawn. Imphal-a Bir Tikendrajit International Airport aṭang­in kar tin Nilaini leh Inrinni apiangin Mandalay panin a thlawk dawn a, ticket man hi Rs 14,000 aṭangin a inṭan a ni. 

Official-te chuan Imphal aṭanga international flight thlawh tir tur hian Manipur tan pawh Act East Policy hnuaiah Southeast Asia ram dangte nena inpawhna ṭha a siam phah ngei dawn tih an sawi.