Tripura minister hlui judicial custody-ah dah

Eiruk thubuaia man, Tripura minister hlui leh Communist Party of India-Marxist (CPI-M) hruaitu, Badal Chowdhury chu kar liam ta Zirtawpni khan ni thum chhung judicial custody-ah dah turin tih a ni.  Chowdhury chuan an puhna hi thu dik lo a ni tih sawiin, a fihlim tih a lang ngei dawn tih a sawi. 

Tripura-a Left Front sorkar laia PWD minister, Chowdhury hi minister a nih laia PWD project sum ṭhahnem tham tak tihchingpenna inhnamhnawiha puh a ni. October 30 khan private hospital-a dahluh a nih dawnin man a ni a, police station-ah lak niin heta ṭang hian sorkar damdawiinah dah luh leh a ni. 

Zirtawpni khan damdawi-in aṭang hian chhuahtir a ni a, district court-ah hruai a nih hnuin judicial custody hnuaiah ni thum chhung awm tura tih leh a ni. Police-te chuan ni nga chhung kawl dil mah se, district and sessions judge Sabyasachi Datta Purakayastha chuan a hnawlsak. 

Court pawna chanchinthar lakhawmtute a kawmnaah, Chow­dhury chuan sorkar chuan thu dik lo hmangin a man a, a hrem ngawt thei lo tih sawiin, an puhna lakah hian thiam a chang ngei dawn tih a sawi bawk. Chowdhury chuan a laka police-te chet dan chu a sawisel bawk. "Private hospital aṭang­in tihluihna hmangin min hruai chhuak a,  lock-up-ah pawh hrehawm takin min dah bawk a ni," a ti. Mahse hei BJP kaihruai Tripura  sorkar chuan a pha thung.