AP-ah FTI pathumna tur sa ṭan ta

India rama Film and Television Institute (FTI) pathumna tur chu Aruna­chal Pradesh-a Papum Pare district-a Jollang-Rakap ah sak ṭan a ni ta. 

Prime minister Narendra Modi chuan ram acre 253-a zau institute sakna tur lungphum hi kumin February thla khan a lo phum tawh a ni. Kar kal ta Inrinni khan he institute sak bul ṭanna hi neih niin, hemi pual hian inkhawm tawi buatsaih a ni. He hunah hian Satyajit Ray Institute of Film and Television Institute, Kolkata-a Professor A Dutta chuan institute sak tur pawimawhna hrang hrangte sawilangin,  cinematography, sound and lighting engineering, direction leh a kaihhnawih subject dangahte tualchhung mi, ṭhalai talent nei ṭha tak takte chherchhuah an ni thei dawn a ni, a ti. 

Information and public relations director Obang Tayeng pawhin state sorkar chuan project hi a hma thei anga zawh a nih theih nan theihtawp a chhuah dawn tih a sawi bawk. Institute sakna tur biala chengte chu project a hlawhtlinna tura pui turin a sawm a, institute chu India ram puma a thar ber zinga tel pha tura ṭan lak pui turin a sawm a ni. 

Project thawktu tur,  K K Construc­tion hotu Hu Tatu chuan tualchhung mite nena inhriatthiamna an neih zel theih chuan, cheng vaibelchhe 128 man project hi kum hnih chhunga zawhfel hman a nih tur thu a sawi bawk.