Assam cabinet-in resolution 75 pawm

Assam cabinet chuan October 9 khan resolution 75 a pawm a, prime minister Narendra Modi-a'n Assam leh hmarchhak bial hmasawnna kawnga a thawhhlawknate tarlan a ni. Resolution-ah hian infrastructure, inkalpawhna, industry ṭhanlenna, healthcare, zirna, remna leh muanna bakah venhimna lama hmasawnnate tarlan tel an ni.

Chief minister Himanta Biswa Sarma chuan special cabinet meeting hi kaihhruaiin minute 90 chhung vel an nei. Meeting hi PM Modi-a'n kum 25 chhung vantlang rawngbawlna a lo kalpui tawhna puala buatsaih niin, Gujarat Chief Minister a nih aṭanga Prime Minister a nih chhunga hmasawnna kawnga hma a laknate sawilan a ni. Meeting zawha thuthar lakhawmtute a kawmnaah, Sarma chuan venhimna lam thuam chak a nih avangin hmasawnna kawngah nasa takin a pui tih a sawi a, inkalpawhna siamṭhat kawngah huang zauh zel niin, economy dinhmun a ṭhat chhoh zel thu a sawi bawk.

CM Sarma chuan remna leh muannain hmasawnna a thuam chak tih sawiin, inkalpawhna ṭha chuan hun remchang a siam bakah, industry leh investment-te chuan economy ṭhanlenna a thlen thu leh, healthcare leh zirna ṭha chuan mihring theihna leh thiamna a tihpun thu a sawi. Chief Minister chuan, Modi chu Prime Minister a nih aṭangin Assam-ah hmasawnna leh inthlak danglamna nasa tak a thleng a ni, a ti.