Polytechnic pathum din belh a ni dawn: Meghalaya Education Minister

Meghalaya education minister Lahkmen Rymbui chuan October 8 khan, state-ah technical leh skill-based education huang zauhna turin polytechnic pathum din belh a ni dawn tih a sawi. Shillong Polytechnic Diamond Jubilee lawmna tawp kharnia thu a sawiah, Minister chuan state-ah polytechnic pali a awm mek thu leh, pathum din belh a ni dawn tih a puang.

'Vocationalising the Future' tih thupui hmanga hun hmanah hian Minister chuan technical institution-te chu an course leh training programme-te update fo turin a hriattir. Rymbui chuan zirlaite hnena hands-on training leh practical exposure pek a nih theihna turin, polytechnic leh industry-ten thawh hona nasa lehzual an neih a phut. Electric-vehicle training pekna tur automobile company-te nen thawh hona siam a rawt a, solar technology lam inzirtirna atan renewable-energy agency-te nena thawh ho bakah, East Jaintia Hills-a cement factory-te leh mechanical engineering zirlaite industrial training pekna tur ruahmanna siam a rawt bawk.

Sorkar chuan technical education mamawh zawng zawng a phuhruk thei lo tih sawiin, job market inthlak danglam zel avangin zirlaiten hnathawh tur an hmuh theihna tura an mamawh thiamna an neih theih nan kawng thar siam a pawimawh thu a sawi. Rymbui chuan kum 60 liam ta chhungin Shillong Polytechnic aṭangin graduate 10,000 chuang an awm tawh tih a sawi a, chung zingah chuan chief engineer-te leh department head-te an awm tih a sawi. Shillong Polytechnic hi kum 1965 October thla khan Assam state hnuaiah din a ni a, Meghalaya-a diploma-level technical education zirna hmun pawimawh tak a ni chho ta a ni.