FNTA-in Nagaland hmar lamah avenue thar a hawng dawn: Governor

Nagaland governor Nand Kishore Yadav chuan Ningani khan, Nagaland hmarchhak district paruk awmna Frontier Nagaland Territorial Authority (FNTA) inremna siam hmangin mitin huap hmasawnna, institution, infrastructure ṭha zawk leh helai bial mipuite tan remchang ṭha zawk a hawng dawn tih a sawi.

He inremna hi Eastern Nagaland People's Organisation (ENPO), sorkar laipui leh Nagaland sorkar chuan February 5 khan an ziak a ni. Nagaland Assembly chuan FNTA Bill 2026 hi September 3 khan pawmin, state hmarchhak lama hmasawnna nasa zawk a thlen theihna tura hun rei tak aṭanga ruahmanna siam tawh hlen chhuahna tur a nih thu a sawi. Yadav chuan he inremna hi Nagaland hmarchhak lam tan mellung pawimawh tak a nih thu leh, inbiakna, inhriatthiam tawnna leh democracy chawinunna mipui hmasawnna tur a nih thu a sawi a ni.

He thu hi department official-te leh civil society member-te nen Tuensang DC conference hall-a interactive session an neihah a sawi. Tuensang chuan Nagaland chanchinah hmun pawimawh tak a luah thu sawiin, Yadav chuan district mipuite chuan ramri leh infrastructure lama harsatna an tawh pawhin huaisenna, chhelna, thawhrimna leh khawtlangah rilru put hmang dik an lantir fo a ni, a ti. Sorkar leh mipui inkarah thawh hona ṭha a awm chuan inrelbawlna ṭha zawk leh, district hmasawnna a thlen dawn tih a sawi bawk.