Manipur: CM-in Union Home Minister hmu

Manipur chief minister Yumnam Khemchand Singh chuan, October 8 khan New Delhi-ah union home minister Amit Shah a hmu a, state-a buaina chhuak titawp tura sorkarin hma a lakdante a hrilh. Meeting-ah hian Khemchand chuan Manipur-in buaina an tawh mek sukiang turin sorkar laipui thlawp chhunzawm zelna a ngen a, Shah chu state tlawh turin a sawm bawk.

Chief Minister Office thuchhuah chuan Shah hian he sawmna hi pawmin tun thla chhungin Manipur a tlawh dawn tih a tarlang. Meeting hi Khemchand-a'n Union Home Minister-in state a tlawh maithei nia a sawi aṭanga ni hnih hnuah neih a ni a, Shah-a'n state a tlawh hun tur tak erawh sawichian a la awm lo. Meeting-ah hian Imphal-Dimapur-Guwahati bus service ṭan chungchang pawh an sawi dun a, hei hian Manipur leh ṭhenawm state inkara veivakte tan hahdamna a thlen tih Khemchand chuan a sawi.

Khemchand chuan state buainain ziaawm lam a pan theihna tura state sorkar hmalaknate sawilangin, buainain mipui a nghawng dan a hrilh. State-a harsatna leh buaina thleng mek tihtawp a nih theihna turin sorkar laipui puihbawmna a ngen bawk a ni. Union Home Minister chuan remna leh muanna a awm theihna tura state sorkar hmalakna chu a lo fak a ni.