Meghalaya: IFAD President-in Ri-Bhoi district tlawh

International Fund for Agricultural Development (IFAD) president Álvaro Lario chuan, October 10 khan Meghalaya-a Ri-Bhoi district-a farmer cooperative leh agricultural processing facility-te tlawhin, Meghalaya Livelihoods and Access to Markets Project (Megha-LAMP) hmasawnna a endik. He hun hi loneih lam kaihhnawih institution tihchakna, thlai thar chhuah tihchangtlunna tur leh, thingtlang lama loneituten ram chhung leh ram pawn market nena inzawmna ṭha an neih theihna tura hmalakna a ni.

IFAD palai chuan Umwang khuaa Umwang Pyllun Integrated Village Cooperative Society (IVCS) chu tlawh hmasa berin, he hunah hian khawtlangin market zau zawka an thlai thar chhuah an hralh theihna tura hma an laknate thlirlet a ni a, financial service leh lo neih dante endik a ni bawk. He hmalakna hian lakhuihthei, sawhthing leh bay leaf (tejpata) chingtute chu infrastructure leh service pek an ni a, an thil thar chhuah leh market-a an hralh chhuah tihchangtlunna turin a pui a ni. Lario chuan khawtlang mite hlawhtlinna chu fakin, ṭanrual leh thawh hona ṭha an neih vang a nih thu a sawi.

Lario chuan Bhoirymbong-a Eastern Ri-Bhoi Organic Farmer Producer Company Ltd Prime Hub pawh tlawhin, helai hmunah hian sawhthing leh aiengte an thar chhuak a ni. Lario chuan processing unit a tlawh bakah, loneitu pawlte leh tualchhung enterprise neitute nen inbiakna an nei a, Singapore-a aieng thawn tur a vailiam bawk.