Nagaland: Tikhir leh Yimkhiung community inkahnaah mi 1 thi

Nagaland-a Kiphire district-a Tikhir leh Yimkhiung community inkara nimin Pathianni, October 11-a inkahna thlengah mi pakhat a thi. Buaina chhuakah hian chenna in tam tak hal a ni tih report chuan a tarlang.

Inkahna hi Zirtawpni aṭang khan Longtsunger-a thleng ṭan niin, Tikhir community member-ten festival an hman chungchanga buaina chhuak niin police-te chuan an sawi. Zaonger khuaah hian an bungruate pawh halral a nih thu an sawi.

Buaina chhuah nasatna hmunah hian venhimna kengkawh turin security force dah belh an ni a, district thuneitu chuan Pungro sub-division hmun ṭhenkhatah buaina chhuak chhunzawm zel tur venna tur leh, remna leh muanna a awm theihna turin, Bharatiya Nagarik Suraksha Sanhita (BNSS) Section 163 hnuaiah khapna thupek a tichhuak bawk.

State deputy chief minister leh home minister ni bawk, Yanthungo Patton chuan community pahnihte chu buaina laka inthiarfihlim tur leh dan kengkawhtu agency-te thlawp turin a hriattir. Buaina chu inbiakna hmanga chinfel theih a nih thu a sawi bawk. He buaina chhuak chungchangah hian Eastern Nagaland Peoples’ Organisation (ENPO) chuan mipuite chu inremna vawng nung turin an ngen bawk. ENPO president Chingmak Chang chuan, Yimkhiung leh Tikhir tribal council-te chu buaina chhuak titawp a, nunphung pangngaia awm leh tura a rang lama hma la turin a ngen a ni.