Meghalaya: CM-in PM hnenah Early Childhood Development model theh lut

Meghalaya chief minister Conrad K. Sangma chuan,New Delhi-a Departmental Summit on Women and Child Development buatsaihah, prime minister Narendra Modi hnenah Meghalaya-in Early Childhood Development (ECD) Mission hnuaia a hmalaknate a theh lut. He hunah hian 'Reimagining Anganwadi Centres for Better Delivery of Nutrition and Early Education' tih thupui hmangin minute 20 chhung presentation neih a ni bawk.

Presentation hi Zirtawpni khan neih a ni a; Chief Minister, Union Minister leh sorkar laipui aṭanga senior official-te bakah pawl thlan bikte an tel a ni. CM Sangma chuan amah ngei pawh pa a nihna angin, fate ngaihsak leh an tana hun pek chuan rah ṭha tak a chhuah theih thu leh, an ṭhanlenna kawngah nasa takin a pui thei tih a sawi. State in Early Childhood Development Mission a kalpuina hnuaiah, human delevelopment department-te leh community institution kaltlangin naupangte chu theihna an neihte tihpuitlin sak tum a nih thu a sawi.

Prime Minister hnenah hian Mission 1000 Days-in a thil tum hrang hrangte chu Chief Minister hian a hrilh a, nuin nau a pai laiin Department of Health, Women and Child Development leh NRLM-te bakah, IIT Bombay nen ṭangkawpin mother skill workshop an kalpui ṭhin thu leh, he hunah hian nu naupaite chu naute hnute pek dan chi 45 zirtir ṭhin an ni, a ti. Sangma chuan nu naupai, naute hnute pe lai leh naupang kum hnih chin chu kum thum chhung kar khatah vawi hnih, Anganwadi Center-ah chaw ṭha pek ṭhin an nih thu a sawi a, Self-Help Group-ten an pui ṭhin tih a sawi bawk.