Assam: AASU-in Himashree Boro thihna chhui chian phut

All Assam Students’ Union (AASU) chuan Andhra Pradesh-a rel kawng bulah Assam mi, Himashree Boro-i thia hmuh a nih chungchanga lungawi lohna lantirin October 11, Pathianni khan Guwahati-ah candlelight march an nei a,pawikhawihtute chhui chian an phut. Zirlai pawl chuan thuneitute hnen aṭanga thu rintlak an phut thu leh, hmarchhak bial hmeichhiate leh ramchhung hmun danga zin veivakte venhimna khauh zawk siam an phut bawk.

AASU chief adviser dr Samujjal Bhattacharjya chuan thuneitu ṭhenkhatten he inthahna hi an ngaihven loh nia sawiin, Boro thihnaa inhnamhnawihte chungah hremna na tak pek an phut thu a sawi. Candlelight march chu Boro-i'n dikna chanvo a neih theihna tur leh, hmarchhak bial aṭanga state pawna zin veivakte himna chak zawka kalpui an phutna lantirna a nih thu a sawi a ni.

Hmarchhak bial mipuite chu ramchhungah ngei an him lo a, state pawna zinchhuah chu tun thlengin a la him lo tih Bhattacharjya chuan a sawi bawk. Sorkar laipui leh state sorkar hrang hrangte chu hmarchhak bial mipui him theihna tura ruahmanna felfai tak siam turin a phut. Hmarchhak bial mipui himna kenkawh chu sorkar laipui leh state sorkar hrang hrangte mawhphurhna a nih thu a sawi bawk.