Meghalaya: Heroin Rs vbc 1.5 hu man

Meghalaya police-te chuan Thawhṭanni zing khan, East Jaintia Hills district-a endikna an neihah heroin nia rinhlelh, gram 409.89 vel market-a Rs vbc 1.5 hu nia chhut an man.

East Jaintia Hills-a Police Superintendent office-in press release a tihchhuahah, heng heroin nia rinhlelhte hi Umkiang Police Patrol Post hnuaia Kuliang huam chhunga Damcherra-ah zing dar 1 vela man a nih thu an sawi.

Police-te chuan Maruti Eeco ambulance registration number, ML-13-B-1459 chu lirthei endikna an neih hnuah an hreng a, he lirthei hi Silchar aṭanga Guwahati an pan lai man a ni. Motor an enfiahnaah plastic sahbawn bawm 27-a ruihhlo ni ngeia rinhlelh hi an man a ni. Ambulance-a chuang mi pali chu man an ni a, Silchar-a cheng vek an ni.

Narcotic Drugs and Psychotropic Substances (NDPS) Act Section 8(c), 21(c) leh 29 hmangin Lumshnong Police Station-ah Case No. 39(10)2026 hnuaiah thubuai ziah luh a ni. Police-te chuan state hmar lam luhkaa beihpui thlakna hi state puma crime network tihtawpna tura hmalakna kalpui mek zinga mi a nih thu an sawi.

East Jaintia Hills SP Shailendra Bamaniya chuan an state-a ruihhlo lut turte vengin police-te chuan theihtawp an chhuah a, state dang aṭanga luhkaahte dap chhuah beihpui thlak hi an kalpui tih a sawi a ni.