Assam: Pobitora Wildlife Sanctuary hawng

Assam-a Morigaon district-a Pobitora Wildlife Sanctuary chu kum 2026-27 tourism season atan hawn niin, sanctuary tlawhtute tan jeep leh elephant safari-te a awm dawn a ni. Forest minister Jayanta Mallabaruah chuan tourism season thar hi forest department official, police-te leh tualchhung mipui hriatpuinain a hawng a ni.

Sanctuary hawn a nih hma hian thuneitute chuan, khualzin veivah tihawlsamna atan kawng chhiate an siamṭha a ni. He season-a safari service kalpuina tur hian jeep 30 hman a ni dawn a, tlawhtute chuan jeep leh elephant safari hmangin sanctuary hi an fang kual thei dawn a, ramsate leh an chenna hmun hmuh theihna hun remchang a siamsak dawn a ni.

Pobitora Wildlife Sanctuary hi Morigaon district-a awm niin square kilometre 38-a zau a ni a, samak ki pakhat nei (one-horned rhinceros) hi 106 an awm mek a, hei hi a larpui hle a ni. Ramsa dang zingah lawi leh sanghal bakah sava chi hrang hrang hmuh tur an awm bawk. Sanctuary hi Assam-a khualzinte tlawh tam ber pawl niin, ramchhung leh ram pawn aṭangin tlawhtu ṭhahnem tak an awm ṭhin a ni. Tourism season hmasaah khan ramchhung aṭangin tlawhtu mi 42,000 chuang an awm a, ram pawn aṭangin mi 763 in an tlawh bawk.