Arunachal: CM-in Siang Valley-a security dah tlem remti

Arunachal Pradesh chief minister Pema Khandu chuan, Siang Valley-a security force dah zat chu tihtlem a remti a, 11,200 MW hydropower project kalpui tum dodal kawnga lungawi lohna lantir kaihhnawiha FIR ziah luh tawhte hnuhkir ​​a remti bawk. He thil pahnih hi Adi Baane Kebang Youth Wing leh Adi Students’ Union-te'n Thawhlehnia Chief Minister ho meeting an neiha an thil phut pawimawh zingah a tel.

Meeting zawha X-a thuchhuah a siamah, CM Khandu chuan state sorkarin buaina awmte chu inbiakna leh inhriattthiam tawnna hmanga chingfel turin hma a la chhunzawm zel dawn tih a tarlang. Inbiakna neih a nih chuan inrintawnna leh inhriatthiam tawnna neih a pawimawh thu a sawi. Pawl pahnihte thil phut chu a pawmsak thu leh, ṭha taka an thawh ho zel theih a beisei thu a sawi.

Siang Valley-a hydropower project thawhna tura pre-feasibility report (PFR) siam chu Adi hnam ṭhenkhatin an dodal a,an hnam nunphung leh khawsak dan thlengin a nghawng dawn nia sawiin titawp turin an phut. Lungawi lohna pawh lantir foin buainate pawh a lo chhuak tawh a ni. Adi pawl pahnihte hian an buaina chungchangah Chief Minister hian inrawlh tur leh, project thawh turin a nghawng turte pawh awmze nei taka inbiakna neihpui turin an phut.

Hetih lai hian sorkar lam chuan project hi thawh a nih chuan economy leh khawtlang hmasawnna kawnga a pui dawn tih sawiin, ṭhalai tan hna tam tak thawh tur a siamsak dawn a, an state tan water leh energy security pawh a tihchak phah dawn tih a sawi thung. PFR siam pawh thutlukna tawp a la ni lo tih sawiin, state sorkar chuan thutlukna a siam hmain khawtual mite pawh a berawn dawn tih a tarlang.