Tripura: Kum 2030-ah renewable energy MW 500 siam chhuah tum

Tripura State Electricity Corporation Ltd (TSECL) managing director, Biswajit Basu chuan Nilaini khan kum 2030-ah chuan renewable energy MW 500 siam chhuah tum a nih thu leh, rooftop solar tihpun, electric storage infrastructure tihhmasawn, tui in tur pump-na solar power-a thlak tum a nih thu a sawi.

Agartala-a TSECL corporate office-a World Standards Day hmannaa thu a sawiah, Basu chuan energy thianghlim, man tlawm leh awlsam zawka hman theih siam a pawimawh thu a sawi. Electric mamawhna a san zel avangin state-a power infrastructure leh renewable energy huang zauh a ṭul thu a sawi bawk. Programme hi 'A Shared Vision for a Better World: Affordable and Clean Energy' tih thupui hmanga neih a ni a, Indian Buildings Congress (IBC), Tripura State Chapter leh TSECL buatsaih a ni.

Basu chuan economy ṭhanlenna atan leh, khawtlang hmasawnna atan electric rintlak leh man tlawm siam chhuah a pawimawha, hun lo awm tura ṭhangtharte tana energy security siam tur chuan energy thianghlim hman a ngaih thu leh, electric siam chhuah tihpun a ṭul thu a sawi. Hei bakah Artificial Intelligence (AI) leh technology dang hluar chho zel karah power mamawhna a pun zel thu a sawi bawk. Basu chuan renewable energy tihpun chuan hun lo awm tura electric mamawh phuhruk kawngah a pui dawn tih a sawi.

Tripura hian solar power hi MW 35 a siam chhuak mek a ni. State chhunga sorkar building 1,919 zinga 90 chuan solar power system an hmang tawh a, building dangah pawh hman chhoh zel tum a ni.