Jail aṭangin UNLF hruaitu RK Meghan chhuah

Manipur helpawl, United National Libe­ration Front (UNLF) hruaitu, RK Meghan, Sanayaima tih bawk chu kar liam ta Inrinni zan khan Guwahati Central Jail aṭangin chhuah tir a ni. 

Sorkar laipui leh Naga helpawl, NSCN-IM te inbiakna neih mekin Manipur ram chin a nghawng duh lohna lantira Manipur-a pawl hrang hrangten nawrh an huaihawt mek lai a nih avangin, UNLF hotu Meghan chhuah a nih pawh hi media lamin an ngaihven lohna turin a ruk thei anga tih a ni. 

Meghan hi Manipur sorkar laka indo puang­ah puh anih avangin man a ni a, kum 10 tantir a ni. Nimin khan Imphal a pan nghal rin a ni bawk. Kum 1964-a din, UNLF hi hmar­chhak helpawl upa ber  zinga a ni a, Manipur inrelbawlna hran phutin kum tam tak an hel tawh a ni. 

Sanayaima tia hriat lar, Meghan hian Manipur hi martial law hnuaia awm niin a sawi a, hei vang hian inthlan buatsaih ṭhin pawh hi dan kalh tia sawiin, an pawm lo tih an sawi. Kum 2010 khan Bangladesh thuneitute chuan Meghan hi manin, India kutah an hlan a ni. Meghan hian man a nih hnu hian vawi khat mah bail-a chhuah a dil lo. Kum 2016 khan thiam loh chan tir a ni a, Rs 70,000 chawi tur leh kum 10 chhung tang turin hrem a ni. A tan hun hi kum 2020-a zo tur ni mah se, a tan chhunga a nungchang ṭhat avangin Inrinni zan khan chhuah a ni ta tih a advocate, Gunedhor Morangthem chuan a sawi.