Assam leh Malaysia trade body ten inremna ziak
Assam sorkar hnuaia Industries and Commerce Department leh Malaysia India Business Council (MIBC) chuan thawkdun turin inremna an ziak.
Inremna hi Pathianni khan Guwahati-ah an ziak a, Industries and Commerce minister Chandra Mohan Patowary leh MIBC president Tan Sri Ir Kuna Sittampalam ten an telpui. Inremna an siamah hian trade leh investment lamah India leh Malaysia-in thawhdunna kawng zau zawk zawn an remti a, a bikin education, tourism leh primary industry sector-ahte thawhdunna ṭha zawk siam an remti a ni. Business leh trade mission-ah ram pahnihte intlawh tawnna siam a, seminar, conference, exhibition, economic leh technical fair, information bureau, symposia ahte theih anga inpuih tawn an rel.
Assam leh Malaysia tan trade and cultural exchange siamte an remti bawk a ni. Minister Patowary chuan kum 2021-a hawn hman tura beisei, trilateral highway chuan Myanmar leh Thailand kaltlangin Assam leh Malaysia inkalpawhna a siam dawn a ni, a ti. Kaladan multi-modal project chuan Malaysia nena insumdawnna awlsam zawk a hawng dawn tih a sawi bawk.
Sittampalam pawhin India leh Malaysia chuan kum 2011 khan sumdawnna lama thawndunna tur inremna an lo siam tawh tih sawiin, kum 2018-19 a ram pahnihte insumdawn tawnna chu US dollar tluklehdingawn 17.24 a tling tawh a ni, a ti. Assam nena inremna an siam chu thil chhinchhiah tlak tak a nih thu sawiin, India ram aṭanga ei tur chi hrang hrang an lakluh nasat avangin hmarchhak bial chu Malaysia-in ei tur a lakluhna pui ber an ni thei dawn a ni, a ti.