Meghalaya: Child protection project tlangzarh

Meghalaya-a East Khasi Hills-a Meghalaya State Legal Services Authority (MSLSA) leh, District Legal Services Authority (DLSA) chuan Mawlai Block-a POCSO thubuai 29 leh, Mawryngkneng Block-a thubuai report 26 a awm hnuah naupang venhim kawnga hmalakna an kalpui. Project hi Ka Jingkyrmen (Beiseina) tia vuah a ni a, state sorkar nen ṭangkawpa siam niin nimin Zirtawpni khan tlangzarh a ni.

He hmalakna hi naupangte chunga pawikhawihna venna, an dikna chanvo hriatthiamna tihchangtlun leh, Protection of Children from Sexual Offences (POCSO) Act, 2012 hnuaia community level-a naupang venhimna kalphung tihchakna tura ruahman a ni. Meghalaya High Court chief justice Revati Mohite Dere chuan he hmalakna hi thubuai lo awm tawhte aṭanga kalpui a nih thu leh, chung zingah chuan tleirawl inngaihzawnna chungchangte a tel tih a sawi. Chief Justice chuan naupangte chu lehkhazir ngai pawimawh tur leh, an tumram hlen chu an hmalam hun atan thil pawimawh a nih thu a sawi bawk.

Social Welfare department commissioner leh secretary, Pravin Bakshi chuan project chu legal awareness, sorkar department leh stakeholder-te thawh honaa kalpui a nih tur thu a sawi. Mawlai Block-a POCSO thubuai 29 report a awm avangin, awareness leh invenna lam theihtawpa kalpui a ṭul thu a tarlang. Bakshi chuan naupang venhimna tura hmalakna hrang hrang sawi langin, chung zingah chuan Mission Vatsalya leh Child Care Institution-te pawh a tel.