Nagaland: Jakhama khua Women Village atan pawm

Nagaland khawpui, Kohima district huam chhunga Jakhama khua chu Department of Women Resource Development hnuaia Myki Village Adoption Initiative hnuaiah 2026-27 chhung atan Myki Village (Women Village) atan pawm a ni. DIPR report tarlan danin, October 15 khan Jakhama khuaa Panchayat Hall-ah Women Village atana pawmna programme hman a ni a, MLA Kevipodi Sophie chu khuallian a ni.

He hmalakna hi department-in Myki Activity hnuaia village level-a hmalakna awmsa tihchangtlun leh market inthlunzawmna siamṭhatna hmanga hmeichhiate economy tihhmasawn a tumna a ni. Sorkar policy 'one district-one product' zulzuiin, he hmalakna hi thlai thar chhuah leh hralh chhuah tihpunna tura kalpui a ni. Jakhama khuaah hian hybrid purun an ching uar hle a, ṭhahnem tak an thar chhuak tawh bawk. He hmalaknaah hmang hian khuaa lo neihna hmun pariata hmeichhe loneitu 10 ṭheuh thlan chhuah an ni a, a chhawr ṭangkaitute chu mi 80 an tling.

Programme hman zawhah technical session buatsaih a ni a, he hunah hian Jakhama Village Council, Village Development Board (VDB), Jakhama Women's Organisation leh Women Resource Development department official-te an tel. He hmalakna hian lo neih kawnga hmeichhiate thuam chak chu a tum ber a ni a, thlai thar chhuah tihpun leh hralh chhuahna huang zauh theihna tura ruahman a ni bawk a ni.