Assam sorkarin rualbanlo 248 hna pe

Assam chief minister Sarba­nanda Sonowal chuan Inrinni liam ta khan sorkar department hrang hrang hnuaia Grade III post-ah rualbanlo 248 te hna a pe.

Sarbananda Sonowal hian hna pek tharte appointment lehkha hi staff lak tharte hnenah hian hlanna a nei a, he hun hi state Social Welfare Department-in Guwahati-ah an buatsaih a ni. CM Sonowal chuan rualbanlote chu society tipumtu an ni tih leh sorkar pawhin an ṭhatna tur a ngaihtuah nasat thu a sawi. Hna hmu tharte chu a lawmpui thu sawi nghalin, rim taka an hna thawk turin a fuih bawk.

"Assam sorkar chuan Deen­dayal Divyang Sahajya Scheme tlangzarhin hemi hnuaiah hian rualbanlo nuai 1.51-te chu kum khatah cheng 5000 pek an ni," a ti. Assam hian tun dinhmunah hian rualbanlote hnenah kum khatah cheng 1000 an pe ṭhin a ni. Chief Minister hian Social Welfare department website a tlangzarh nghal bawk. He hunah hian rualbanlote hnenah unique identity card sem nghalin, ICDS worker-te hnenah smartphone a sem nghal bawk.