Manipur: Deputy CM-in Kangpokpi-a Naga khua tlawh

Manipur deputy chief minister Nemcha Kipgen chuan, Kangpokpi assembly biala Naga-te chen tamna khua tlawhin, Kuki leh Naga community chu inremna leh inkungkaihna ṭha zawk nei turin a ngen. Kumin February thla aṭanga Kuki-Naga inkara buaina chhuak vangin mi 70 vel an thi tawh a ni.

October 17-a prime minister, Narendra Modi-a'n kum 25 chhung mipui rawngbawlna a lo kalpui tawh puala Seva Sankalp Abhiyan 2026 programme hman tawp kharnia thu a sawiah, Kipgen chuan buaina leh tharum hmanga inbeihna chuan hmalam hunah nghawng pawi tak a nei dawn tih a sawi. He hun hi Yaikongpao khuaah hman niin tualchhung mite hnenah water storage tank leh inchhung bungruate sem a ni nghal bawk.

Official-te chuan hmeichhe kutkawih eizawnna (entrepreneurship), Lakhpati Didi hmalakna leh Manipur Women Empowerment Scheme chungchangah awareness camp an buatsaih nghal bawk a ni. Community pahnihte hmaa thu a sawiah, Kipgen chuan Kristian a nihna angin remna leh muanna pawimawhzia tarlangin,hnam hnih inkara inbeihna leh inthahna thleng ṭhin chu pawi a tih thu leh, mi nunna laksak ṭhinte chu Pathian ram an thleng dawn lo tih a sawi.

Kipgen chuan Kangpokpi mipuite chu state hmun ṭhenkhatah buaina a chhuak chung pawha district headquarters-ah remna leh muanna an chhawm nung vang leh, sumdawnna an chhunzawm zel avangin a fak bawk. District dang tana entawntlak ni turin a fuih a, remna leh muanna chu an nitin nuna lan chhuah tir turin a ngen a ni.