Tripura : Kum 2026-27 chhungin ram hectare 6,000-ah oil palm chin tum

Tripura sorkar chuan kum 2026-27 chhungin ram hectare 6,000-ah oil palm chin a tum a, hei hi oil palm thar chhuah tihpun leh, loneituten sum tam zawk an lak luh theihna tur a nih thu October 19 khan official chuan a sawi.

Ram hectare 4,700-ah oil palm chin a ni tawh a, a bak hectare 1,300 chu nakkum March thla chhungin chin hman tum a nih thu Agriculture and Farmers Welfare and Horticulture department director, P.B. Jamatia chuan a tarlang.

State-ah hian tun dinhmunah oil palm chingtu mi 10,000 an awm mek a, sorkar chuan oil palm chungchang awareness nasa takin a kalpui a, a bikin tlangram huam chhunga chengte chu oil palm ching uar tura tih an ni. State sorkar chuan mimal enkawl nursery kaltlangin oil palm ṭiak a thlawnin a pe chhuak bawk.

Jamatia chuan sorkar laipuiin loneitute kum li chhung atan sum lama ṭanpuina a pe mek tih a sawi. Oil palm chin ṭhatna sawilangin, Jamatia chuan oil palm mai bakah thlai dang loneituten an ching thei a, sum lak luh a tipung a ni, a ti. Oil palm chu kum li vel hnuah puitlingin, kum 30 vel a hman ṭangkai theih tih a sawi bawk.

Tripura boruak chu oil palm chinna atan a ṭha tawk tih sawiin, kum 2027-28 ah ram hectare 10,000 ah chin tum a nih thu a sawi. State sorkar chuan oil palm processing factory chu North Tripura district leh West tripura district-ah siam belh a tum tih sawi bawkin, he facility pahnih hi nakkum December thlaah hman ṭan theih beisei a ni.