Meghalaya MP-in chi inthliarna chungchang chhui chiang turin ngen

Meghalaya Rajya Sabha MP James P.K. Sangma chuan, Delhi police-te chu content creator Amir Shokeen-a video viral-a Tripura ṭhalai pakhatin chi inthliarna chungchanga tihduhdah a tawh chungchangah First Information Report (FIR) theh lut tur leh chhui chianna nei turin a ngen.

Delhi police commissioner Anurag Kumar hnena October 20-a lehkha a thawnah, Sangma chuan Shokeen hian ṭhalai pakhat chu 'Chinese' tia a koh thu tarlangin, hmarchhak bial mi hmuhsitna a lantir a ni, a ti. Sangma chuan he thil thleng hi thil nuihzatthlak emaw, content siamna emaw anga sawi theih a nih loh thu leh, hmarchhak bial mite zahawmna tichhe thei chi inthliarna a nih thu a sawi. He thil thleng hi ngawih bo pui mai theih a nih loh thu leh, Delhi leh khawpui dangah hmarchhak bial miten chi inthliarna, hmuhsitna leh tihduhdahna an tawh chhunzawm zel avangin a lungawi loh thu a sawi. Nikum December thlaa Dehradun-a Tripura zirlai Anjel Chakma thihna chungchang pawh sawilangin, chi inthliarna chuan inthahna hial a thlen tih a sawi.

Sangma chuan kum 2014-a Special Police Unit for the North Eastern Region (SPUNER) din a nih thu a sawi. Hei hi hmarchhak bial mipuite venhimna atana din a ni a, chi inthliarna kaihhnawih thubuai pawh a ngaihtuah tel a ni. MP chuan Police Commissioner chu jurisdictional police station emaw, Special Cell-a Intelligence Fusion and Strategic Operations (IFSO) unit emaw chu SPUNER nen ṭangkawpin video leh a kaihhnawih social media content enfiah turin a ngen a, FIR theh lut turin a ngen a ni. Agartala police pawhin he thil thleng chungchangah hian thubuai ziak lut tawhin, a chhui chian hna thawk turin Delhi an pan thuai dawn nia sawi a ni.

Chi inthliarna lam hawia Tripura ṭhalai pakhat tihnawmnah a nih chungchang hi social media lamah pawh demna a nasa hle. Union parliamentary affairs minister Kiren Rijiju leh Tripura chief minister Manik Saha te pawhin action lak an phut thu an lo sawi tawh bawk. CM Saha chuan Tripura Director General of Police chu hemi chungchang chhuinaah Delhi Police-te thawhpui turin a hriattir bawk.