Nagaland: NYM-in Lok Bhavan-ah vantlang inkhawm buatsaih dawn

Naga Youth Movement (NYM) chuan October 28 hian, state khawpui Kohima-a Lok Bhavan-ah vantlang inkhawm buatsaih a tum a, hei hi Naga politics buaina chinfelna tura kum 2015-a siam Framework Agreement leh 2017-a siam Agreed Position a taka kalpui an phutna lantirna atana tih a ni.

Nilainia Dimapur-a Hotel Saramati-a press conference buatsaiha thu a sawiah, NYM member Molung Naha chuan an pawlin July 8 khan Governor hnenah memorandum an theh lut tih sawiin, October 8 kha hun tiam an pek hun chhung a nih thu a sawi. Tun thlenga chhanna an la hmuh tak loh avangin October 13 khan memorandum an theh lut nawn leh a, mahse chhanna an dawng chuang lo tih a sawi bawk. Hun tiam pek hnuah chhanna an dawn loh avangin NYM chuan Naga ṭhalaite leh mipui thil phut chu direct-a Governor thlen an tum tih a sawi a ni.

Naha chuan NYM chu Governor hian appointment a la pek loh thu sawiin, an thil phut chu kum 2015-a hruaituten Framework Agreement an siam leh, kum 2017-a Agreed Position an siamte tihhlawhtlin a ni tih a tarlang.