Meghalaya: Sorkar office 83% in PwD staff nei lo

Blind Lead Trust chuan RTI hmanga thu a zawh fiahnaah, Meghalaya-a rualbanlote tana reservation siam kawngah thil felhlel a awm tih tarlangin, public office 115 zinga 95-a hnathawk zingah rualbanlo, person with disability (PwD) an awm lo tih hriatchhuah a ni, a ti. Trust hian RTI 115, sorkar department-ah 106 leh zirna inah pakua a theh lut a, August 25 khan chhanna a dawng a ni.

RTI tinah hian PwD hnathawk lak dan, backlog vacancy, roster system leh sports quota chungchangte zawh a ni. Zawhna chhannaah hian sorkar office 20-ah emaw 17% emawah chauh rualbanlote hnathawh tir an ni tih tarlan a ni a, 83% chuan rualbanlo hnathawka lak an nei lo tih tarlan a ni bawk. Office 102 zinga 75 chuan rualbanlo staff an nei lo a ni. Report chuan department-ten Persons with Disabilities Act, 1995 leh RPwD Act, 2016 hnuaiah mandatory reservation roster emaw, carry-forward vacancy-te an kalpui lo tih a tarlang bawk.

Roster leh reservation-ah office 115-a 30 chauhin chhanna an pe a, 67-in chhanna an pe lo. Office 23 chuan roster an nei lo tihin an chhang. Sports quota-ah office 91-in chhanna an pe loa, 19-in an nei lo tih an report bawk. Principal Chief Conservator of Forests office chauhin RPwD Act hi mumal takin an kalpui a ni.

September thla khan Social Welfare Department chuan 2018, June aṭanga 2026, March inkar chhungin PwD tana government residential home emaw vocational training institution emaw ruat a awm loh thu a lo tarlang tawh bawk a ni.