Assam-in inbiakna neihpui turin Paresh Baruah sawm

Assam sorkar chuan Paresh Baruah kaihhruai, United Liberation Front of Assam (ULFA) chu inbiakna neihpui turin a sawm. 

Sorkar laipui, Assam sorkar leh Bodo helpawlte chuan Thawhṭanni khan inremna an ziak a, hemi hnu hian state sorkar chuan ULFA hnuaia inbiakna la neih duh loh, Paresh Baruah kaihhruaite chu inbiakna neihpui tur hian a sawm nghal a ni. 

Assam finance minister Himanta Biswa Sarma chuan Baruah kaihhruai ULFA pawlte chu an thil phutte ngaihtuah a, sorkar nena inremna siam dan kawng zawng turin a sawm. Sarma chuan ULFA te hian an thil phut hi inbiakna hmanga chinfel an duh a nih chuan sorkar laipui pawhin ṭha taka a lo dawnsawn tur thu a sawi. 

Sarma chuan, "PM Narendra Modi hruai­na hnuaiah sorkar laipui chuan Bodo-te thil phut hrang hrang pawh chingfelin, Bodo Peace Accord pawh ziahfel a ni thei ta a ni. ULFA-te hian inbiakna hi neih an duh a nih chuan, sorkar pawhin inremna siampui ngei a duh tih pawh min hrilh nghal a ni," a ti. Bodo Peace Accord an ziah tak vangin Bodo-ten state hran an phutna pawh Thawhṭanni aṭang khan tihtawp nghal a ni tih Sarma chuan a sawi nghal bawk. 

Manipur helpawlte inremna siam tura sorkar chu inbiakna neihpui turin Assam minister chuan a sawm nghal bawk a, "Hmarchhak state, Arunachal Pradesh leh Nagaland-te pawh hmun ralmuang tak a ni tawh a ni. Manipur leh Assam-a helpawlten inremna zawnga sorkar chu inbiakna an neihpui chuan, hmarchhak bial pumah boruak muanawm leh ralmuang a awm thei dawn a ni," a ti.